U-DJ Tira usejoyine inqwaba yosaziwayo bakuleli ababeke impilo yabo obala ngohlelo olungokoqobo. UDJ Tira ogama lakhe langempela uMthokozisi Khathi, unkosikazi wakhe uGugu Khathi nezingane zabo bazoba ynngxenye yaloluhleli.
Ngokwemithombo esondelene nalesi sihlabani, lezi zithandani ezihlale zisesitayeleni seziqalile ukushutha uhlelo lwazo isinyenyela. Umthombo wengeza ngokuthi laba bashadikazi banikezwe isamba semali esihle abangakwazanga ukusiphikisa. Loluhlelo luzoveza umndeni wakhe, ukukhuphuka kwakhe endimeni yomculo ngesikhathi esebenzisana kakhulu noDJ Sox kwiDurban’s Finest futhi ehlangene neKalawa Jazzmee ukwenza umculo waseThekwini uthandwe.
Ngokusho komthombo, lo mculi oshisa izikhotha unezindaba nempilo enohlonze azoyikhombisa kuloluhlelo okuhlanganisa nendlela asungula ngayo inkampani aqopha kuyo, i-Afro Entertainment, waphinde wabusa endimeni yomculo enabaculi abafana neBig Nuz eminyakeni engaphezu kweshumi edlule.
Yize esephenduke indoda yomndeni, eshade nowayengumdansi weMafikizolo, uGugu, uDJ Tira uke waba nezinkinga ezindabeni zothando. Wake washada noLale Ngcobo umshado wabo waphela ngesehlukaniso esibuhlungu ngemuva kweminyaka emibili. Umshado walensizwa eneminyaka engu-47 ubudala waphetha kabuhlungu sekunukwana nangokuthakatha. Kusazobonakala ukuthi uhlelo lwangempela luzohlanganisa yini umshado wakhe wangaphambili.
Loluhlelo kulindeleke ukuthi luqale kungekudala nje kwesinye isiteshi sikamabonakude esingakadalulwa.