IsiShayamthetho saKwaZulu-Natal sibikelwe ngezindaba ezibucayi ezithinta imali eMnyangweni wezeMfundo esifundazweni. Umnyango umoshe izizumbulu zemali ngezijeziso, ukukhokhelwa kwamaholo ngendlela engafanele, nezibonelelo. Ngaphezu kwalokho, izikebhe eziningi ezithengelwe ukuthutha izingane ziwele imifula ngezikhathi zemvula azisebenzi.
UMcwaningi Mabhuku Jikelele ubikele iKomidi Lezimali Zomphakathi (Scopa) ukuthi ukusetshenziswa kwezimali okungagunyaziwe komnyango kunyuke kusuka ku-R4 million ngo-2022/23 kuya ku-R63.5 million ngo-2023/24. Izindleko ezisetshenziswa ngendlela engafanele nezingenazithelo manje sezimi ku-R207 Million.
NgokoMthetho Wokuphathwa Kwezimali Zomphakathi, umnyango kufanele uphenye ukusetshenziswa kwemali okungagunyaziwe futhi uthathe izinyathelo zokulungisa. Kodwa-ke, imenenja enkulu ezindlini zomcwaningi mabhuku KwaZulu-Natal, uMnuz Sinenhlanhla Sibiya, uthe uMnyango wehlulekile wukuphenya ngokusetshenziswa kwemali ngendlela engafanele esikhathini esidlule, okunomthelela omubi ekulethweni kwezidingo.
Ngonyaka odlule, uMnyango wayihoxisa inkontileka yezigidi zamarandi yoHlelo Lukazwelonke Lokondliwa Kwabantwana Ezikoleni ngemuva kokuba umcwaningi mabhuku ekhale ngokusethaenziswa kwemali ngokufanele. Yize kunezinkinga zokungena nokuphuma kwezimali, umnyango usaqhubeka nokusebenzisa ngokweqile, njengoba usune-overdraft yasebhange engaphezu kuka-R1 billion.
Umnyango uphinde ukweleta imali engaphezu kwengxenye yebhiliyoni ngenxa yokukhokhelwa ngokweqile kwamaholo nezibonelelo, okuhlanganisa nesinye isikhathi lapho umsebenzi ethola u-R20,000 esikhundleni sika-R2,000. Usihlalo weScopa, uTim Brauteseth, ufuna umbiko womnyango onemininingwane ngezinhlelo zokulungisa lezi zinkinga.
Ezinye izikole zike zacishwa amanzi nogesi ngenxa yokungakhokhelwa kwezikweletu. Umnyango ubhekene nezijeziso ngokwehluleka ukukhokhela abakweletayo ngesikhathi. Ezikebheni eziyisishiyagalombili ezithengelwe ukuthutha abafundi, sinye kuphela esisebenzayo.