Owayengumdlali weKaizer Chiefs uJosta Dladla wethemba ukuthi leli qembu lizonika umqeqeshi omusha uNasreddine Nabi inkululeko yokusayinisa abadlali abayifunayo.
UNabi osuke eBrussels eBelgium waya e-Istanbul izolo ujoyine iChiefs eTurkey ekhempini yokulungiselela isizini izolo ebusuku.
AmaGlamour Boys aqale ikhempu yawo yokulungiselela isizini ngoLwesine olwedlule kanti abegadwe iphini likaNabi uFernando Da Cruz.
UNabi unikezwe umsebenzi omkhulu wokuvusa iqembu elikhulu kuleli kodwa elingakaze linqobe ngisho esisodwa isicoco kumasizini ayisishiyagalolunye. “Asikhulume iqiniso, siyazi ukuthi iChiefs sekunesikhathi eside ingenzi kahle. Yilapho obona khona ukuthi yiqembu elikhulu. Yize zingenzi kahle kodwa abantu basafuna ukukhuluma ngazo,” kusho uDladla kwabezindaba ngesikhathi kwethulwa iDStv eKasi Champs of Champs.
“Unomqeqeshi uNabi ozodlula; IChiefs iphansi phezulu futhi akekho olindele lutho kuyona. U-Nabi ulapha ukuze akhe kabusha iqembu. Njengomqeqeshi oza eqenjini eselidonsa kanzima manje…ngeke kube lula ngoba…uzofuna ukuza nabadlali bakhe. Ngithemba nje ukuthi abaphathi bazomnika inkululeko yokwenza umathanda.
“Uma ehluleka ngeke asole muntu ngoba bamnike konke abekufuna.”
Yize ikilabhu isikuqinisekisile ukuthi izohamba idlanzana, ayikaze imemezele noma imuphi abadlali bayo abasha, okukhombisa ukuthi ifuna uNabi abe nezwi lokuthi izoza nobani ebhodini.
“Njalo uma iChiefs ifuna ukusayinisa umdlali, sonke siyazi ukuthi kwenzekani [amanye amaqembu amsayinisa]. Sebebonile ukuthi bafuna ukwenza izinto zabo buthule,” usho kanje. “Futhi abantu abaningi bangase bangathandi bathi iChiefs ithule ayenzi lutho kodwa babona ukuthi bafuna ukwenza izinto zabo buthule.
“Bagxekwe ngokungenzi kahle, okwamanje bazama ukushintsha izinto eziningi. Asibanike ithuba sivumele umqeqeshi azinqumele ngabadlali abafunayo. Ngihlanganisa iminwe yami ukuthi kuyasebenza. “
Khonamanjalo, umqhudelwano we-eKasi Champs of Champs uzoqala ngoJulayi 11 kuze kube umhla zingama-21, futhi uzoba sezinkundleni zase-Orlando East esigabeni somzuliswano, kanti owandulela owamanqamu uzodlalelwa eMoletsane Sports Complex.