Sekuqubuke indida mayelana nezincwadi eziphikisanayo ezivela ezinhlangothini ezimbili ezizibiza ngobuholi beqembi i-Abantu Batho Congress elaziwa kakhulu ngokuthi yi-ABC. Zombili lezi zincwadi zikhuluma ngobulungu bukaSotswebhu kuMaspala i-Alfred Duma Local Municipality uKhansela Sabelo Sithole.
Encwadini ebhalwe ngulowo owaziwa njengomholi waleli qembu uMnumzane PG Mavundla ebhekiswe kuSithole leliphephandaba elinayo, ikubeka kucace ukuthi uSithole akaselona ilungu laleli qembu. “Lencwadi eyokuqinisekisa ukuthi awuselona ilungu leqembu i-ABC. Njengoba wawubizelwe ekomidini eliqondisa izigwegwe ongakwazanga ukufika kulo, wathunyelelwa incwadi yokukuxosha ngomhla ka 19 kuMfumfu, wanquma ukungasiphikisi lesi sicelo.” kuchaza incwadi.
Lencwadi iqhubeka ichaze ukuthi ngokomthetho sisekelo weqembu -ABC, Umongameli weqembu unawo wonke amalungelo okuxosha ilunga uma lephule imithetho yeqembu. Phakathi kwezinye izinto axoshelwe zona uSithole ezibalwa yilencwadi, kubalwa ukudicilela isithunzi seqembu phansi, kanjalo nokushaya indiva isinqumo sokumiswa eqenjini.
Ebuzwa uSithole ngalokhu okushiwo yilencwadi akashongo lutho oluningi ngaphandle kokuthi athumelele leli phephandaba enye incwadi athi iphuma ebuholini bangempela beqembu i-ABC. Lencwadi esayinwe yilowo obaziwa njengosihlalo we-ABC kodwa osayine njengoMongameli kulencwadi uMnumzane BM Gwala, ibibhekiswe kwiManager KaMaspala i-Alfred Duma. Lencwadi enekheli laseSteadville inesihloko esithi, “Impendulo yencwadi yokuxoshwa kukaKhnsela uSabela Sithole.”
Lencwadi iqhuba ithi,”Sicela ukukwazisa ukuthi mina njengoMongameli omusha weqembu i-ABC kusuka ngomhla ka 23 kuSeptember 2023, ngiyasichitha isinqumo sokuxoshwa kukaKhansela Sabelo Sithole eqenjini le-ABC, lokhu ngikwenza ngamandla enginikwe wona umthetho sisekelo weqembu njengomholi. Incwadi yokuxoshwa kwakhe othunyelelwe yona eqhamuka ebuholini obudala be-ABC ayikho emthethweni ngoba abusenawo amandla okuthatha izinqumo ezinjengalezi, ngakho sicela niyishaye indiva” kuphetha incwadi.
Lezincwadi isidale ukudideka ngempela ukuthi kanti ubani umholi weQembu le-ABC.
Alaziwa ikusasa likaSithole esikhundleni sakhe sokuba usotshwebhu kaMaspala i-Alfred Duma emva kokuvumbuka kwalezi zincwadi eziphikisanayo.