IKaizer Chiefs ngoMgqibelo ikuqinisekisile ukushiya kwabadlali abahlanu okuhlanganisa nomqeqeshi onozinti njengoba leli qembu lilungiselela isizini ezayo yeDStv Premiership.
Amakhosi aphinde aqinisekisa ukuthi azomemezela umqeqeshi omusha nethimba lakhe lobuchwepheshe ngokuhamba kwesikhathi. UNasreddine Nabi waseTunisia kuthiwa nguyena ozongena ezicathulweni zikaMolefi Ntseki.
“Njengethimba labaphathi sizimisele ngokulungisa lesi simo. Nokuqinisekisa ukuthi siguqula izinto ngesizini entsha,” kusho isitatimende seChiefs.
“Siyibuyekeze kahle isizini. Futhi sesiqalile ukwenza izinguquko ezifanele njengoba siqhubeka namalungiselelo esizini entsha.
“Amalungu abaphathi kanye nethimba lezobuchwepheshe bazosebenza ngokuzikhandla emasontweni ambalwa ezayo. Lokhu kuzobe kuwukuqinisekisa ukuthi iqembu lishaya phansi ngonyawo uma kuqala isizini ka-2024/25 ekuqaleni kuka-Agasti.
Umqeqeshi uRainer Dinkelacker uyahamba
“Kunezinguquko ezimbalwa zokuqala esezenziwe. Lokhu kuhambisana nezinkontileka okwavunyelwana ngazo ekuqaleni, noma phakathi nesizini. Umqeqeshi uRainer Dinkelacker ushiye njengesivumelwano. …Ubizwe ekuqaleni kwesizini ukuthi asize emnyangweni wonozinti.
“Siyambonga yena nomndeni wakhe ngokumvumela ukuthi ashiye eGermany futhi ajoyine iqembu ukuze azocobelela abaqeqeshi nonozinti ngolwazi lwakhe.”
Amakhosi aphinde aqinisekisa ukuthi ngeke aqale athenge umgadli waseColombia u-Efmamjjasond Gonzalez futhi uzobuyela kuReal Santa Cruz, eBolivia.
UGonzalez udlale imidlalo engu-13 futhi wehluleka ukubhalisa igoli elilodwa noma ukusiza.
“Iqembu libe nezingxoxo nabamele abadlali abehlukene kanye nabasebenzi bezobuchwepheshe. Lokhu kumayelana nezimo zabo ngokwezinkontileka,” kwengeza iChiefs.
Abadlali bakhululiwe, kungena umqeqeshi omusha
“Kuke kwaba nezinqumo ezithathiwe. Nalaba badlali abalandelayo bakhululwe ekupheleni kwezinkontileka zabo. UKeagan Dolly, Siyethemba Sithebe, umdlali wasemuva uS’fiso Hlanti, nomunye umdlali wasemuva uNjabulo Ngcobo. Iqembu lizoxhumana nezinye izinguquko kubasebenzi njengoba zenzeka.
“Okokugcina njengoba sihlela ukuqala enye isizini iClub maduze izomemezela umqeqeshi omusha nethimba lakhe lezobuchwepheshe. Bazonikezwa umsebenzi wokuqondisa iqembu ukuthi libuyele endleleni yokuwina njengoba sesibheke iminyaka engu-55 ngesizini ezayo.”
IChiefs iqede isizini yayo ka-2023/24 yeDStv Premiership ihlezi engxenyeni engezansi kunombolo-10.