Noma nje ikilabhu yakhe iJomo Cosmos idlala ku-ABC Motsepe League, isihlabani sebhola uJomo Sono usagcizelela ukuthi iyona kilabhu ehamba phambili eNingizimu Afrika.
Ekhuluma no PrimeSportsWithMahlatse ngesikhathi kwethulwa izimoto zokuxhasa iCosmos ngabaxhasi bayo abasha, iLucas Batteries ngoLwesihlanu olwedlule, uSono uthe noma abantu bengathandi, iCosmos ingenye yamaqembu amakhulu eNingizimu Afrika. Ubuye wathi akubalulekile ukuthi ikilabhu idlala ezingeni eliphansi, “uma sibheka iqiniso, uJomo neJomo Cosmos bawuphawu olulodwa oluhlangene futhi ngeke bashiye umlando webhola eNingizimu Afrika.”