Kuqubuke omunye futhi umsindo ngezinqumo zonompempe emdlawleni wowamanqamu we MTN obuseMoses mabhida Stadium eThekwini ngempelasonto. Lomdlalo obuphakathi kweOrlando Pirates okuyiyona ebivikela isicoco, kanye neMamelodi Sundowns engagayelwa mphako kulezi zinsuku, ugcine unqotshwe ezikamagebhula ngamagoli amathathu kwelilodwa sekukhahlelwa amapenadi emva kokuthi umdlalo uphele zibambene ngeqanda ngapha nangapha emva kwesikhathi esengeziwe.
Abalandeli abaningi beMamelodi Sundowns baphume enkundleni bengeneme neze ngezinqumo zikanompempe obephethe umdlalo uMnumzane Abongile Tom. Abebekhala ngakho kakhulu yizinqumo zakhe abathi bezinokwenzelela phakathi. Lokhu kuze kwafakazelwa ngumqeqeshi wayo iSundowns emva komdlalo uRhulani Mokoena nakubeke kwacaca ukuthi ukube unondweba ubewuphethe kahle lomdlalo, ngabe bawunqobile.
Abalandeli beKabo yellow bakhala ngepenadi abathi kumele ngabe inikezwe iSundowns lapho ibhola liye lashaya engalweni kumdlali weZimnyama uBandile Shandu engaphakathi ebhokisini. Esinye isigameko abathi sishayisa amakhala yilapho unozinti wePirates uSipho Chaine ekhilibhe khona umdlali weSundowns phakathi ebhokisini kepha wathula engathi ufile unompempe.
khona manjalo, kuvele elomhlathi Kubathandi nakubalandeli be orlando pirates ngekathi iqembu labo libuya likwazile ukuvikela lendebe ababeyinqobe ngonyaka owendlule bebhekene naMazulu fc.
Lithe ukwehla ijoka kumqeqeshi wezi mnyama njengoba ezakhe zikwazile ukuvikela. U Jose Riveiro ongowokudabuka ezweni lase Spain uthe into ebasize kulomdlalo obunzima ngenxa yesimo sezulu ebesingesihle ukuthi amaqhinga abafike nawo bawasebenzise kahle ngaphandle kokuxhamazela.
Uthe ngokusho kwakhe kanjalo akaqondile ukuzikhukhumeza kodwa bayazi ukuthi leli yibhola namuhla uyawina kusasa uphinde udliwe. Uphinde wacacisa ngesinqumo abasithatha ngo Chaine kowe Caf njengoba bamukhipha sekuyokhahlelwa ama penalty. Nalapho eveze khona ukuthi iqhinga labo alisebenzanga njengoba babedlala neqembu abangalazi kodwa babethi bazama ukuba thusa ngoOfori benza sengathi uyena oyingozi kuma penalty kodwa ngeshwa, isikhuni sabuya nomkhwezeli.
Ezimnyama zizoke ziqhubeke kahle ne mibhiyozo yazo njengoba bayoze babuyele enkundleni ngomhla ka 24 kwe phezulu bebhekene no Suthu.