Ngesikhathi lapho izikole zisemaholidini, abahleli bomdlalo webhodi owaziwa ngeChess eNkosi Langalibalele bathi babone kuyisikhathi esihle kakhulu kubo ukuthi bahlele umncintiswano walomdlalo obandakanya izikole ezehlukene zaseLanga Libalele. Lo mqhudelwano wezikole obungoLwesithathu obubandakanya abantwana abangaphansi kweminyaka elishumi nambili (under12) , abangaphansi kweminyaka elishumi nanhlanu( under15) kanye nabaneminyaka engaphansi kwelishumi nesishiyagalolunye ( under19) ububanjelwe edolobheni eMtshezi.
Lomdlalo owaziwa kakhulu njengomdlalo wabantu abakwazi ukucabanga bajule, uzosiza kakhulu ukukhiqiza izinjula buchopho nokungenye yezindlela zokuthuthukisa intsha ukuze izokwazi ukucabanga ngokujula okunobuhlakani.
Umqondisi wezemisebenzi yomphakathi uNksz Z.M Mnyandu uthi lomncintiswano bahlose ukuba wenzeke minyaka yonke ngoba uyabalekelela kakhulu ukugqugquzela abantwana ukuthi basebenzise imitapo yolwazi ukuze benze kangcono ezifundweni zabo. Kuzokhumbuleka ukuthi kulelizwe sibhekene nenkinga lapho kubikwe ukuthi iningi labantwana abafunda ibanga lesine abakwazi ukufunda ngokuqonda. Imincintiswano efuze lena kungenzeka ilekelele ukuphucula lesi simo.
Beziyshumi nantathu izikole ezibe yinxenye yalomqhudelwano kulonyaka, kanti kunethemba lokuthi uma uqhubeka ziningi nezinye izikole ezizoba yinxenye yawo.