Izibalo zikhombisa ukuthi amacala amaningi okuthumba nokuphoqwa kwemindeni yalowo osuke ethunjiwa ukuthi bakhiphe imali enzeka KwaZulu-Natal (KZN) naseGauteng. Lobu bugebengu buyanda, futhi izigebengu ziqala ukugxila emindenini yabantu abalahlekile, zinikeze ulwazi lwamanga ngokucela imali. IGauteng ibike amacala angu-81, kanti i-KZN inamacala angu-15, amanye ahlobene nokuhweba ngabantu.
U-Prem Balram we-Reaction Unit South Africa (Rusa) uthe abantu abangaphezu kuka-15 babikwe ukuthi balahlekile ngo-Agasti, abanye babo batholakala kamuva. Kwesinye isimo, uMinenhle Manyoni, umfundi wase-College of Cape Town, walahleka. Umndeni wakhe, ongowasePietermaritzburg, waxhaphazwa ngabakhohlisi abacele imali ngokubanikeza ulwazi, nakuba bengakaze bahlinzeke imininingwane yasebhange. Lolu hlobo lokuxhaphaza seluyinsakavukela, lusebenzisa usizi lwemindeni.
Umphenyi ozimele uBrad Nathanson uqinisekise ukukhula kokuxhaphazwa kwabantu bekhohliswa ngokuthi amalunga emindeni yawo ikhona futhi bangabuya inqobo nje uma bengakhipha isamba semali esithile. U-Chad Thomas, wase-IRS Forensic Investigations, uchaze ukuthi akhuphukile amacala okuthunjwa kwabantu kuhloswe ukufuna imali. uthi lokhu kudalwa isigwebo esiphansi esitholwa abathumbi kuleli uma betholakale benamacala
UKhomishana wamaphoyisa ase-KZN uNhlanhla Mkhwanazi ugcizelele ukuthi amacala amaningi okuthunjwa ahlelwe ngenhloso yokuxhaphaza abantu baqolwe izimali zabo. Uveze ukuthi kwezinye izimo, abantu abathola izimali ezinkulu, njengalabo abazuza kwi-Road Accident Fund, bayathunjwa bethunjwa yizihlobo zabo nabangane babo abasondelene nabo. UMkhwanazi uqinisekise ukuthi amaphoyisa asebenza ngokuzikhandla ukuqinisekisa ukuthi isimo siyalawulwa e-KZN.