Kuze kwasa hluthu belokhu beshiyelane inkundla abaculi abadumile KwiBergville Extravaganza yakulonyaka.
Lolu chunge chunge lemicimbi lwaminyaka yonke luhlelelwe ukugqugquzela ezokuvakasha kulendawo, uhlelwa uMaspala uKhahlamba ubanjwa njalo uma kuqala uZibandlela eBergville Sports Complex. Lomcimbi awugcini nje kuphela ngeFestival yomculo kepha uhlanganisa nomgijimo weMarathon, Umncintiswano wokudoba, izinkundla zokucija amaciko nokunye okuningi.
Emcimbini omkhulu obukhona izolo obuhlanganisa abaculi abehlukahlukene bakuleli, kugqame kakhulu ukugcwala kwabantu. Bekuvalwe ngomuntu emnyango abathandi bobumnandi bezozibonela mathupha abaculi ababathandayo. Abaculi abahamba phambili kuleli abafana nNasty C, Blackie, Kwesta, Babes Wodumo bashiye izihlwele zifuna impinda.
Kuze kwasa hluthu zilokhu zisina zidedelana izinsizwa nezintokazi ngengoma Kujabulisile futhi ukubona abanye abaculi abadabuka kuso isifunda sasoThukela nabo benza abadume ngakho phambi kwabantu bangakubo. Abaculi abafana noXowla, Big Zulu, SBlaq Diamond, Dj Zinyo namaSiblings benze into yamehlo nabo esteji.