Ukhihle isililo phambi kwamaphoyisa asesiteshini saseMnambithi umama kaSiyabonga Zikalala owanyamalala ngenyanga ka-April emva kokuthathwa ngamaphoyisa.
Umama kaSiyabonga ubeyingxenye yemashi ebisuka enkundleni yezemidlalo eSettlers Park edolobheni eMnambithi, iya ekamu lamaphoyisa khona kuleli dolobha. Lemashi, ebihanjelwe yizinkumbi zabantu baselokishini laseSteadville, ibihlose ukuhambisa uhlu lwezikhalo zabo ngokungeneliseki ngendlela amaphoyisa asingethe ngayo udaba lukaSiyabonga.
Usiyabonga wayekade exabene nomunye umlisa wakhona eSteadville ngesikhathi esemsebenzini njengoba ebekade esebenza njengomakhi wezindlu. Emva kwalengxabano, kuthiwa usiyabonga washaya lona omunye umlisa ngetshe okwadala ukuthi lomlisa abize amaphoyisa. Kuthiwa ngempela lafika iphoyisa nokho lalingahambi ngemoto yamaphoyisa emakiwe kodwa kwakuyimoto nje. Waboshwa-ke uSiyabonga nokwathi uma umndeni usuyombheka ngakusasa watshelwa ukuthi uSiyabonga uphulukundlelile ezandleni zamaphoyisa wabaleka. Amaphoyisa athi uSiyabonga wabe eseziphosa emfuleni iKlipriver obude buduze nesiteshi samaphoyisa, nokuyilapho nawo amaphoyisa amgcina khona.
Ekufikeni kwalomphakathi esiteshini samaphoyisa namuhla, utshelwe ukuthi uMphathi siteshi akekho ngoba kuvele isifo kubo. Uhlu lwezikhalo lwamukelwe uKhenela uZuma, othembise ukuthi bazobuya nezimpendulo zingakapheli izinsuku eziyisikhombisa.
Phakathi kokukunye obekubhalwe wumphakathi kulomqulu wezikhalo kukhona nalokhu okulandelayo:
- Umphakathi ufuna ukukhonjiswa umfanekiso wamakhamera asesiteshini samaphoyisa ukhombisa uSiyabonga ebaleka njengoba amaphoyisa ethi wabaleka
- Umphakathi funa ukwazi kabanzi ngesikhathi abathi leliphoyisa elaliyomlanda lasichitha emgwaqeni uForbes Street ngaphambi kokufika naye esiteshini. Bathi kunamahora amabili avela kulwazi lweCar Tracker olukhombisa lokhu, bafuna ukwazi ukuthi yini lena engaka eyayenziwa kulomgwaqo noSiyabonga.
Lomphakathi usabise ngokuthi kuzovalwa idolobha lonke mhla bebuya uma kungukuthi abazitholi izimpendulo ezibagculisayo ngaloludaba.