UNGQONGQOSHE wezeMfundo KwaZulu-Natal, uMnuz Sipho Hlomuka, useveze ukuthi uMnyango ngeke usebenzise isabelo sezimali sakamuva soMgcinimafa kuzwelonke ukubhekelela amaholo abasebenzi. Lesi sinqumo siza njengoba umnyango ususebenzisa imali eningi ekukhokheleni abasebenzi, okuwukhinyabeza amandla awo okuxhasa ezinye izinsiza ezibalulekile.
Ngesikhathi ethula inkulumo yakhe ebuyekeziwe yesabelomali, uNgqongqoshe wezeziMali uMnuz Enoch Godongwana wabele iminyango yezemfundo nezempilo u-R19.2 billion. Nokho uHlomuka uchazile ukuthi uMnyango wezeMfundo KwaZulu-Natal usebenzisa u-82% (R51 billion) wesabelomali sawo sika-R62 billion emiholweni yothisha abangu-86,905, othisha abangu-919 abasemahhovisi kanye nabasebenzi abangu-11,240. Lokhu kushiya kuphela u-18% wesabelomali sezinye izinsiza ezibalulekile, njengengqalasizinda, izinhlelo zokudla ezikoleni, kanye nezindleko zokusebenza.
UHlomuka ubalule izinselelo ezidalwe yilokhu kusetshenziswa kwemali ngokweqile okubalwa nokubambezeleka kokukhokha kwabahlinzeka ngemisebenzi. Uphinde wakhuluma ngomthelela weziphepho kanye nezikhukhula zakamuva ezicekele phansi izikole ezingu-52. Yize amagumbi okufundela angomahamba nendlwana angu-55 abelwe izikole ezithintekile, ezinye izikhungo zisalinde izixazululo zesikhashana.
UNgqongqoshe uphinde wazwakalisa ukukhathazeka ngokwanda kobugebengu nodlame ezikoleni okuhlanganisa nezigameko zokushaywa nokuhlukumeza. Ugcizelele isidingo sokusebenzisana nemiphakathi, abomthetho, neminye iminyango kahulumeni ukuze kwakhiwe izindawo zokufunda eziphephile.
Uphenyo mayelana nokungezwani kwezinhlanga e-Centenary High School lusaqhubeka, ngenhloso yokubhekana nezimbangela ngokuphelele. UHlomuka ugcizelele ukubaluleka kokuxazulula izinkinga ezinjengalezi ezingeni lendawo ngaphambi kokuthi zidluliselwe ezikhulwini eziphezulu.