Izithunywa zoMnyango wezokuThuthukiswa koMphakathi zizolibhekisa eMauritius ngoMsombuluko ukuyobuyisela ekhaya ingane eneminyaka emihlanu eyavaleleka ngesikhathi unina eboshwa kuleliyazwe.
Umama waboshelwa ukushushumbisa izidakamizwa ngoMeyi 2019 ekhulelwe. Ingane inakekelwa ngunina ngesikhathi ilinde ukubuyiselwa eNingizimu Afrika, kusho okhulumela uMnyango wezokuThuthukiswa koMphakathi uBathembu Futshane.
“Uma ingane ingabuyiswa eNingizimu Afrika, ingase ifakwe ohlelweni lwezenhlalakahle eMauritius, okuyinto engeke imsize ngalutho ngoba lokho kungase kuphazamise amathuba ayo okubuyiselwa emndenini wakubo eNingizimu Afrika,” kusho uFutshane.
Umnyango uthole isicelo esivela emnyangweni wezobudlelwano bamazwe ngamazwe nokubambisana ngoMeyi sokuba usize ekulandeleni umndeni walona wesifazane kanye nokuhlola ukuthi kungenzeka yini ukuthi ingane ibuyiselwe ekhaya.
Umthetho iChildren’s Act ugunyaza ukuthi umnyango ubuyisele ekhaya izingane zaseNingizimu Afrika ezicindezelekile emazweni angaphandle.
UFutshane uthe ngemuva kokuhlola ugogo wayo owayehlonziwe waseNorth West kwatholakala ukuthi ukulungele ukugada ingane.
Umnyango kulindeleke ukuthi ubuye nengane ngoLwesihlanu.
“Ekubuyeni kwabo eMauritius, ingane izogcinwa kugogo, ovumile ukuthi uzoyigada kuze kube unina uyakhululwa.”
Umnyango usubuyisele ekhaya izingane ezingu-22 ebezicindezelekile emazweni angaphandle kusukela ngo-2015.
Lokhu kuhambisana noMthetho Wezingane, othi ingane idinga ukugcina ukuxhumana nomndeni wayo noma umndeni, isiko namasiko.