UMENGAMELI weNkatha Freedom Party (IFP) uMnuz Velenkosini Hlabisa uthi kumele kungenelelwe ngokushesha ukuze kuqinisekiswe ukuthi amabhizinisi espaza abuyela kubantu baseNingizimu Afrika.
UHlabisa ubekhuluma nabezindaba engesikhathi i-IFP ibungaza izinsuku eziyi-100 zoHulumeni Wobumbano Lwesizwe (GNU) kanye noHulumeni Wobumbano Lwezifundazwe (GPU).
I-IFP ihola iGPU KwaZulu-Natal.
“Siphinde sikhumbule izingane zesikole zaseSoweto eziyisithupha ezashona kabuhlungu ngemuva kokudla ukudla kwasespaza esiphethwe abokufika. I-IFP inombono wokuthi sidinga ukungenelela okuningana okuphuthumayo okumele kuqalwe ukuqinisekisa ukuthi sibuyisela imboni ye-spaza kubantu baseNingizimu Afrika ngesikhathi sisebenzelana nabakwamanye amazwe abangenazo izincwadi futhi abasebenza ngokungemthetho noma abaqhuba amabhizinisi eNingizimu Afrika ngaphandle kokuthobela umthetho. imithetho nemigomo yaseNingizimu Afrika,” kusho uHlabisa.
Khonamanjalo, uHlabisa uphinde wadlulisa amazwi enduduzo ngokudlula emhlabeni kweNkosazana u-Angela Buthelezi, oyindodakazi encane yomsunguli we-IFP ongasekho uMntwana uMangosuthu Buthelezi.
“Iqembu lethu lihlukumezeke kakhulu ngokulahlekelwa, uMntwana uSbuyiselwe u-Angela Buthelezi ubeyithanda i-IFP futhi wasebenzela isizwe sakithi ngokuzinikela njengelungu loMkhandlu Kazwelonke kanye neLungu lePhalamende. Sikhalisana nomndeni wakwaButhelezi nomndeni wonke we-IFP.”