Izikhulu zezokuthutha KwaZulu-Natal zithi sekuyisikhathi sokuthi kushintshwe imiqondo mayelana notshwala nokushayela ikakhulukazi entsheni. Umnyango ubuphawula nge-video ekhombisa izinsizwa eziyisishiyagalombili zilungiselela ukuyozijuxuza ngesonto eledlule.
Okhulumela uMnyango wezokuThutha, uNdabezinhle Sibiya, uthi lesi siqeshana esisabalale ezinkundleni zokuxhumana, kubonakala sengathi sithathwe emahoreni ambalwa ngaphambi kokuthi balahlekelwe izimpilo zabo kabuhlungu engozini eyenzeke eMandeni ngoLwesihlanu.
“Yize uNgqongqoshe eveze ukuthi okwamanje kugxilwe ekududuzeni umndeni othintekile kodwa kubalulekile ukuthi sithumele isixwayiso entsheni.
“Uphuzo oludakayo seluba yinkinga kakhulu ngenxa yezingozi zomgwaqo ezenzekayo. Kukhombisa ngokusobala ukuthi ngoLwesihlanu nangezimpelasonto sinentsha eningi ebandakanyeka ezingozini zomgwaqo.”
NgoLwesithathu, enye ingozi ku-N2 ishiye umuntu oyedwa eshonile.
Khonamanjalo, uSibiya uthi uNgqongqoshe wezokuThutha, uMnuz Siboniso Duma, ucele ubuholi bomnyango ukuthi bukhiphe umbiko mayelana nokulungela kweKZNA ukusebenzisa uhlelo lwama- demerit points.
“U-2025 usekude kakhulu, sifuna ukubona uhlelo lokuhlehla lungena lapha KwaZulu-Natal, ngoba kusobala ukuthi kumele kuthathwe izinyathelo ezinqala.
“Uma kutholakala ukuthi uqhubeka nokwephula imithetho yomgwaqo, uhlelo luzokuveza ukuthi nguwe onecala futhi ekugcineni uzogcina ulahlekelwe yizincwadi zokushayela,” kusho uSibiya.