Kuboshwe abantu abane mayelana nesigameko sokudubula esenzeka eLusikisiki, e-Eastern Cape, lapho kwabulawa khona abantu abangu-18 emasontweni amabili edlule. UKhomishana wamaPhoyisa kuzwelonke uGeneral Fannie Masemola umemezele ukuthi ukuboshwa kwabasolwa kwenzeke engakapheli amahora angu-24 bebikile ngabasolwa.
Abasolwa abathathu kulaba abaneminyaka engu-22, 24, no-31, baboshwe ePort Shepstone ngesikhathi kunomkhankaso wophiko lwezobunhloli wamaphoyisa e-K9 Unit and Public Order Policing. Amaphyisa alunywe indlebe yilungu lomphakathi kwaholela ekubanjweni kwabo emijondolo. Iziphathimandla zisathungatha isibhamu esisetshenziswe ekubulaweni kwabantu.
Umsolwa wesine, uSiphosoxolo Myekethe, 45, uboshwe ngaphambilini wavela enkantolo. UMyekethe, owayephume ngoshwele ngecala lokubulala iphoyisa ngo-2000, manje ubhekene namacala angu-18 okubulala nokutholakala nesibhamu esingekho emthethweni, i-AK-47.
Amaphoyisa akholelwa ukuthi abasolwa abane bazosiza ekuxazululeni leli cala. UMasemola ubonge abantu baseNingizimu Afrika ngosizo lwabo ngokucobelelana ngolwazi, encoma ukwesekwa ngumphakathi ngokusiza amaphoyisa ekuthungatheni abasolwa. Uphinde wancoma ithimba labaphenyi ngesenzo salo esisheshayo.