Bawotha ubomvu abathandi bobumnandi baseMnambithi nasezindaweni ezakhelene nawo ngaakubiza ngokuqolwa kwabo izimali zabo ngabahleli bomcimbi wabantu abadala obekuthiwa uzoba kulendawo.
Bajikiswe ngonogada endaweni yokuncebeleka eyaziwa ngokuthi yiTrenchgula Lodge esendaweni yakwaManzini eseduzane nedolobha laseMnambithi, nobekuyindawo ebekuthiwa lomcimbi uzobanjelwa kuyo ngoMgqibelo wangomhlaka 5 kuMfumfu. Lomcimbi obuwaziwa ngokuthi yiLadysmith Udult Picnic Event ubuhlelelwe abantu abadala kodwa abasahalela ukuba ngabantwana ukuthi bazozijabulisa ngemidlalo eyaziwa ngokuthi ngethandwa kakhulu ngojahidada. kulomcimbi bekuzoba nemidlalo efana noJumping Castle, Trampoline, Water Slides, Egg Racing kanye neminye eminingi.
Amathikithi alomcimbi abebiza R130 lilinye kanti nemvume yokungena neziphuzo zakho ibikhona ngenani elithile.
Ekhuluma nomsakazo wa-online iNqubeko FM uMnikazi walendawo uMnumzane Zungu uthe akakaze ezwe nakanye ngalomcimbi kodwa bamangale nje sekufika abantu ngoMgqibelo bethi beze emcimbini.
Iningi labantu abathenge lamathikithi bathi ubumakethwa kakhulu enkundleni yokuxhumana uFacebook kusuka kuqala lonyaka, “mina ngabona kufacebook ekhasini leLadies House ukuthi kuza into enje, ngase ngithenga amathikithi amabili, okungelami kanye nelomuntu wami ukuze sizozithokozisa. Simangale uma siqhamukela eTrenchgula sibona kukhala ibhungane nje kanti sesidliwe, “kuchaza enye intokazi ekhulume naleli phephandaba. Lentokazi iqhuba ithi intokazi ezibiza ngelika “Okuhle Fest” iyona ebihlale ikhangisa ngalomcimbi, “manje akasaphenduli imiyalezo yethu kuFacebook, uyafunda nje maqede azithulele.”
Akukacaci noma ukhona yini osevule icala ngalelsi sigameko.