Akazange esakwazi nokulala kuyo kanye nje owesifazane wasendaweni yaseStanford eMnambithi endlini abeyakhelwa yikhansela lendawo obehlala ngaphansi kwezimo ezingezinhle.
Lidumele ikhansela lakuward 34 ngaphansi kukamaspala i-Alfred Duma emva kokuthola izindaba zokudlula emhlabeni kwalona wesifazane. Ukhansela Mzuzwana Nkanyezi Magasela, uthi udumale kabi ethola ucingo olumbikela ukuthi lona wesifazane akasekho emhlabeni, “sengidumale kakhulu nje ekuseni mfwethu ngithola ucingo oluthi udadewethu lo akasekho emhlabeni. Siqale lendlu yakhe ezinyangeni ezimbalwa ezedlule emva kokuthola ukuthi yena nezingane zakubo bahlala ngaphansi kwezimo ezingafanele ukuthi zingahlala abantu. Ngibe sengizama ke nami ngafaka isandla ephaketheni ngabona ukuthi kuphumani. Besithi sizoyivula ngokusemthethweni nje indlu yakhe kuleliviki elizoqala kodwa nakhu ke manje sekuvele izindaba ezibuhlungu,” kuchaza uMagasela.
Lona wesifazane kuthiwa ubengumuntu ongaphilile kahle ekhanda, kanti ubehlala nomunye udadewabo naye obephila nokukhubazeka kokungakwazi ukukhuluma.
Ngokusho kweKhansela lona wesimame ubeyedwa ngesikhathi edlula emhlabeni ngoba utholwe omakhi ekuseni bethi bazoqala ukusebenza njengenjwayelo. Kuthiwa udadewabo lona omunye ubengekho vele wathathwa ngumfowabo wamvakashisa lapho ehlala khona. Labo makhi bathe bengena bafike bamemeza lona wesifazane njengoba behlale benza kodwa kwakngaphendula muntu. Babe sebenquma ukuthi bangene babheke ukuthi ngabe ukhona yini ngaphakathi nokuyilapho bezithele phezu kwesidumbu sakhe.
Akukaqondakali noma sikhona yini isandla sesithathu ekufeni kwakhe kodwa namaphoyisa ebesefikile endaweni yesigameko.
UMagasela uthi kungenzeka kuqhubeke ukuvulwa kwendlu yakhe kodwa angeke kusafane noma ebekhona.