Kulindeleke ukuthi kuphume nesinedolo ekhonsathini elindelwe ngamehlo abomvu ezoba sendaweni yobumnandi edumile emnambithi iVida Loca. Lendawo eyaziwa kakhulu ngokuletha osaziwayo abasezingeni eliphezulu ekunombolo 8 Egerton Road edolobheni eMnambithi, izovakashelwa ngumklwebhi wamapuleti odumile nongaconsi phansi kwabesimame u-Oscar Mbo.
Indlela abantu bakulendawo abakhuluma ngayo ezinkundleni zokuxhumana ikhombisa ukuthi likhulu kakhulu isasasa ngokuza kwalomculi kuleli dolobha. Uzokhumbula ukuthi loDJ akaqali ukuvakashela lendawo, uke wafika ezinyangeni ezimbalwa ezedlule, nokuhlalukayo ukuthi abantu bamthokozela kakhulu nokwenze ukuthi abahleli bemicimbi kulendawo baphinde bambize futhi.
UMbo uzobe engahambi yedwa kodwa uzobe eshiyelana inkundla noDJ bendawo okubalwa kubo Dj Wayne, uSbandi, UDj Beano, uDJ Cracker nabanye abaningi.
Kubikwa ukuthi amathikithi ahamba ubuthaphuthaphu njengoba amathikithi omacaphuna kusale(VIP) esephelile. Kanti nawo lawa awethu thina esidla imbuya ngothi aseyaphela. Ngokusho kwekhasi lalendawo kuFacebook azotholakala amathikithi esangeni namhlanje ngenani likaR200 lilinye.