Lempelasonto esiphuma kuyo ibe nezigameko ezehlukahlukene edolobheni eMnambithi. Imicimbi ebithe chithi saka kulendawo ibihlanganisa ifestivali enkulu kamskandi yaminyaka yonke eyaziwa ngokuthi yi- 150 Maskandi Festival, yidili laMahlaya ebelisendaweni yokugembula iGreat Bingo, umgubho wenkampani yamathayi ezinze kulo leli dolobha iDunlop ebihlanganisa iminyaka engamashumi amahlanu, kanye meminye eminingi.
Kubikwe ukuthi ube munye umuntu odlulile emhlabeni ngenxa yokudutshulwa. lomlisa okuthiwa ungowaseZakheni kwa-E, udutshulwe kwenye yezindawo zokucima ukoma emva kwenxabano okuthiwa isuke kweminye yalemicimbi engenhla.
Kanti kusuke esinamathmbo kwi 150 Maskandi Festival ngesikhathi kubambana ngezihluthu abaculi ababili abadumile emculweni kaMaskandi uKhuzani Mpungose kanye noQuality Biyela. Laba baculi bobabili bebeqhashelwe ukuzonandisa kulomcimbi. kusuke esinamathambo lapho laba ababili bejijibezana endaweni ebibekelwe ukuhlala izicukuthwane, nokugcine ngokuthi uMpungose adedele ulabhabha wempama kuBiyela nodiyazele waze wayovunjwa yizinsimbi ebezibiyele lendawo. akukacaci noma likhona yini icala elivuliwe mayelana naloludaba.
Kwesinye isigameko esenzeke kuyona lempelasonto, kudlule umuntu oyedwa engozini yemoto ngesikhathi kutholana phezulu izimoto ezincane ezimbili emgwaqeni uMashisoni eMnambithi phambi kwasesiteshini samaphoyisa. kulesi sigameko kubikwa ukuthi kudlule umuntu oyedwa, kanti abanye bathola ukulimala okungatheni.