Uphiko lwentsha yoMkhonto Wesizwe (MKYL) lumise amalungu alo amabili abefuna ukusungula uphiko lwabafundi kuleli qembu. Izindaba zokumiswa kwabo zimenyezelwe nguNobhala-Jikelele wesikhashana weMKYL, uMinenhle Cibane, izolo.
Amalungu amisiwe uMnqobi Msezane noThamsanqa Khuzwayo. “I-MKYL ithathe isinqumo sokumisa ubulungu bamalungu amabili e-MKYL esifundazweni saKwaZulu-Natali. I-MKYL ifisa ukwazisa izinhlaka zayo kanye nabantu base-KZN ukuthi isibumise kafushane ubulungu bamalungu amabili abebambe iqhaza emizamweni yokusungula uhlaka lwabafundi ngaphandle kokugunyazwa yi-MKLY ne-MK Party,” kusho uCibane esitatimendeni.
Uphinde wagcizelela kuwo wonke amalungu abo ukuthi iMKYL yilona lodwa uhlaka olusemthethweni oluzongenela ukhetho lwe-SRC ezikhungweni zemfundo ephakeme.
UCibane uqhube wathi i-MKYL ayinawo uMbutho Wabafundi we-MK. “Amalungu amisiwe awavunyelwe ukubiza noma ukuhambela imihlangano ye-MKYL, awavunyelwe ukubiza noma ukubiza umhlangano nanoma yiluphi uhlaka lwe-MKYL nanoma yiziphi ezinye izinhlaka ze-MKYL. Awavunyelwe ukuya kunoma iyiphi i-MKYL futhi awavunyelwe ukusebenzisa isithombe sikaMengameli Jacob Zuma sokugqugquzela umbutho wabafundi boMkhonto. Lamalungu amabili okukhulunywa ngawo uMsezane noKhuzwayo banikezwe amahora angu-48 ukuthi baphendule ehhovisi likaNobhala-Jikelele we-MKYL ngokubhala basho ukuthi kungani kungamele baxoshwe.Ukwehluleka ukulandela imibandela kwemigomo yokumiswa kwabo kuzoholela ekutheni baxoshwe ngokushesha,” kusho isitatimende.