Kume nse ukuhamba kwezimoto emgwaqeni omkhulu uMashisoni edolobheni Emnambithi ngesikhathi kunombukiso wezimoto ezishaya isdudla namhlanje.
Lombukiso obusenkabeni yedolobha, ubuhlelwe yinkampani ekhiqiza amathayi ezinze kulona lelidolobha iSummitomo Rubber. lenkampani, ebeyaziwa ngokuthi yiDunlop phambilini ingakashintshi igama, ihlele lomcimbi ukuze ibungaze iminyaka engamashumi amahlanu yaqala ukusebenza kuleli dolobha. Bezisina zidedelana izimoto nezithuthuthu zishaya isidudla zibuye zigile imigilingwane emangaze izinkumbi zabantu ebezithamele lomcimbi.
Abashayeli bezimoto abavela emazweni ahlukahlukene afana no-Italy, Germany kanye namanye amazwe ase-Europe, bashiyelane inkundla besina bededelana ngokuklwebha amathayi. kulomgwaqo. umphakathi nawo ubunikezwa ithuba lokuba yinxenye yalokhu ngokugitshezwa kuzo izimoto lezi ngesikhathi zigila lemikhuba.
Lowo oyisikhulu esiphezulu kulenkampani uMnumzane Lubin Ozoux uthi umangele futhi ujabule ngendlela abantu baseMnambithi abawujabulele ngayo lombukiso. “Ngifike ngezithuba zehora lesishiyagalombili lapha edolobheni, umdlalo lo uqale ngehora lesishiyagalolunye, kodwa ngifike mina kuvele sekugcwele izinkumbi zabantu belindele ukuthi umbukiso uqale.” kusho u-Ozoux. Lensizwa yakwa-Ozoux iqhube yathi, akuklwejwanga nje amathayi kuphela kodwa ubukhona nomcintiswano lapho abantu basemphakathini nabo bebekhombisa ngobuhle kanye namandla ezimoto zabo abawubiza ngeShow and Shine.
Lomgubho awuzukuphelela lapha ekukwebheni amathayi kepha uyaqhubeka impelasonto yonke le. kusazoyiwa nakhona embonini kuyokhonjiswa labo abathandayo ukwazi ukuthi liphekwa kanjani ithayi lisuswa phansi.
Kulindeleke ukuthi kuze kube yisonto elizayo imigubho ilokhu iqhubeka.