INHLANGANO emele abangcwabi isinxuse abakwaCapitec ukuthi bakhokhe izindleko zokwenza isiko lokuhlanza umndeni waKwaZulu-Natal owathatha isidumbu sikamufi wasiyisa egatsheni lebhange ngemuva kokubambezeleka kokuthola izimali zomshwalensi.
Ithimba le-Unification Task Team of the Funeral Industry of South Africa (UTT) lithi lizobhalela ibhange lifuna usizo lwezimali lomndeni wakwaMaliwa kanti lisabise ngokuvala amagatsha akwaCapitec ezweni lonke uma lungaxazululwa lolu daba.
Lesi sigameko senzeke KwaDukuza, lapho umndeni ka-Elizabeth Maliwa waletha isidumbu sakhe egatsheni laseCapitec, uthi ibhange libambezele ukukhipha imali yomngcwabo.
UCapitec uthe isicelo sakhokhwa engakapheli amahora angu-24 kutholwe amaphepha aphelele.
Umndeni uthi nakuba u-R50 000 wagcina ukhokhiwe, ukuhlukumezeka emoyeni nokuphoxeka ngeke kulungiswe.
