Umphakathi waseUitval uvale iSigweje Shopping Centre namuhla ekuseni, ukhombisa intukuthelo ngenxa yamanzi angekho ezimpompini abathi sekuphele izinyanga eziningi engekho.
Akusiwo umphakathi waseUitval kuphela okhalayo. Abantu baseTholeni, Limehill, KwaHlathi nezinye izindawo eziseduze nabo bathi nabo babhekene nenkinga efanayo yokuswela amanzi.
Abahlali bashise amathayi phambi kwenxanxathela yezitolo, okuphoqe ukuthi ivalwe ngokuphelele. Baphinde bavala noHelpmekaar Road, umgwaqo omkhulu ohlanganisa lezi zindawo nedolobha laseMnambithi, kwadala ukuphazamiseka okukhulu kwezimoto.
Ngesonto eledlule, sabhala ngezikhalo zomphakathi waseTholeni, owathi ngisho neKhansela lendawo alisawabambi amafoni abo ngakho njalo belu ukubuza ngamanzi.
Abahlali manje bafuna iMeya yoMasipala uThukela izobachazela ukuthi kungani bengawatholi amanzi, bethi bazizwa benganakwa njengabanye abantu kule ndawo.
