UNdunankulu waKwaZulu-Natal, uMnuz Thami Ntuli, uzonyuselwa umholo wakhe ube ngu-R2 635 562 ngonyaka, kusukela ekuqaleni konyakamali omusha ngo-Ephreli. Lesi sinqumo sithathwe esiShayamthetho saKwaZulu-Natal kulandela isinqumo sikaMengameli Cyril Ramaphosa sokunyusa imiholo yabaholi bezepolitiki ngo-3.8%.
Isiphakamiso senziwe wuSotswebhu omkhulu, uMnuz Blessed Gwala, ngokuhambisana nesinqumo sikamongameli kanye nomthetho wango-1998 olawula imiholo yabaholi abasezikhundleni zikahulumeni.
Amalungu angu-40 avotele ukweseka lesi siphakamiso, kwathi iMK Party kanye namanye amalungu aphikisayo bavota baphikisa. Nokho, ilungu leNFP uNksz Mbali Shinga livote namaqembu abusa ngokubambisana, okwenze isiphakamiso sidlule kalula.
USomlomo uNksz Nontembeko Boyce uthe akusiyo yedwa uNtuli onyuselwe, njengoba namalungu esiShayamthetho nawo enyuselwe imiholo.
