Amadoda aseZakheni akhale ngokungahlonishwa uma engasebenzi emakhaya. Lokhu kuvele emcimbini obuhlelwe umnyango wezempilo obubanjelwe ezindlini zomtapo wolwazi eZakheni.
Amadoda athi uma engasebenzi awahlonishwa nhlobo emindenini yawo okudala ukuthi ahlukumezeke ngokomqondo kodwa kubukeka engathi akekho umuntu onake indaba yawo.
Amanye amadoda athi aseyancishwa nenkonzo yasekameleni emakhaya ngoba ehluleka ukubeka okuthile etafuleni. Acela uhulumeni ukuthi awanake nawo amadoda, ayazi ukuthi kubhekelewa abesifazane kakhulu kunawo, kodwa lokhu ngakolunye uhlangothi kufa imindeni kwehle nesithunzi sawo.
UKhansela uSiphiwe Zwane weWard 2 eZakheni uthi lemihlangano yamadoda ibalulekile. Uthi kwesinye isikhathi uma kuqubuka izingxabano emindenini, ngamakhansela asiza amadoda ukuthi axazulule lezo zinkinga. Ucele uhulumeni ukuthi awasize amadoda ngemifelandawonye.
