Uhulumeni wesifundazwe saKwaZulu-Natal usunxuse ukuthi kube nezingxoxo ezizolile nezakhayo kulandela ukuhlakazwa kweBhodi leNgonyama Trust.
UNgqongqoshe wezokuBuyekezwa koMhlaba nokuThuthukiswa kweziNdawo zaseMakhaya uMnuz Mzwanele Nyhontso uhlakaze ibhodi ngemuva kokusula kwamalungu alo amabili. Lesi sinqumo siza phakathi kwezinsolo eziqhubekayo zokungaphathwa ngendlela kwe-trust.
Okhulumela uNdunankulu waKwaZulu-Natal, uMnuz Thamsanqa Ntuli, uNksz Lindelani Mbatha, uthe uhulumeni wesifundazwe ukulungele ukusebenzisana nazo zonke izinhlaka ezithintekayo ukuqinisekisa ukuthi izinhloso zesikhwama ziyavikeleka futhi ziyaqiniswa.
UMbatha uthe lokhu kubandakanya ukwenziwa ngcono kokuphathwa komhlaba, ukuthuthukiswa kwengqalasizinda kanye nokuvula amathuba omnotho emhlabeni ophethwe yi-trust.
Wengeze ngokuthi uNdunankulu unxuse ukubambisana nokuxoxisana okwakhayo ngesikhathi soguquko, egcizelela ukubaluleka kokusebenzisana ezindabeni ezithinta umhlaba, intuthuko kanye nobuholi bomdabu.
