Umgwaqo wetiyela uSgweje Road, okuWard 36 KwaHlathi ngaphansi koMasipala wase-Alfred Duma, wethulwe ngokusemthethweni namuhla, mhla zingu-07 Julayi 2026.
Lo mcimbi ubuholwa iMeya yoMasipala wase-Alfred Duma, uKhansela Zama Sibisi, obesika iribhoni njengophawu lokwethulwa ngokusemthethweni kwalo mgwaqo. Bekukhona nePhini leMeya, uKhansela Sizwe Simelane, ongukhansela weWard 36, kanye neNkosi uKunene, uKhansela Ntuthuko Mbhense weWard 35, usonkontileka uCnice Plant Hire and Logistics, namalungu omphakathi.
Abaholi bancome lo msebenzi njengengqalasizinda ezothuthukisa ezokuthutha, ivule amathuba entuthuko futhi ithuthukise impilo yomphakathi waseSgweje nasezindaweni ezakhelene nawo. Amalungu omphakathi amukele lo mgwaqo ngenjabulo, ethi uzoletha ushintsho olukhulu endaweni.
