Kwethulwe uhlelo lokweseka nokubhaliswa kwamabhizinisi Entsha. Lolu hlelo lwenziwa ngaphansi kobuholi bebamba leMeya, uKhansela Thembelihle Mthembu, ngokubambisana noMasipala waseNewcastle, ne National Youth Development Agency, ngenhloso yokusiza intsha esifundeni ukuthi ibhalise ngokusemthethweni amabhizinisi ayo.
Lolu hlelo lwethulwe njengengxenye yemizamo eqhubekayo yokubhekana nenkinga ekhulayo yokungasebenzi kwentsha. Njengoba amathuba emisebenzi eseya ngokuncipha, uMasipala uthi uyakuqonda ukubaluleka kokukhuthaza ukuzisebenzela njengendlela yokudala amathuba omnotho aqhubekayo.
Ngalo mkhankaso, intsha enezifiso zokuba ngosomabhizinisi ithola usizo lokubhalisa amabhizinisi ayo, okuvumela ukuthi asebenze ngaphakathi kohlelo olusemthethweni lomnotho. Ukubhaliswa kwebhizinisi kuyisinyathelo esibalulekile esivulela amathuba okuthola uxhaso, ukuqeqeshwa, kanye nokufinyelela ezimakethe ezibanzi. Ngokwenza lula lenqubo, uMasipala nabalingani bakhe basiza intsha ukuthi ithathe izinyathelo eziqondile zokwakha ikusasa layo.
