Ilungu lePhalamende likazwelonke leDemocratic Alliance (DA), uMaliyakhe Shelembe, selibhalele uNgqongqoshe Wezokubusa Ngokubambisana Nezindaba ZoMdabu, uVelenkosini Hlabisa, lifuna achaze ngenqubekela-phambili yokungenelela kukaHulumeni eMasipaleni wesifunda uThukela.
UShelembe ufake umbuzo ePhalamende, ofuna uNgqongqoshe awuphendule zingakapheli izinsuku eziyishumi. Ufuna ukwazi ukuthi kungani uHlabisa engakabuyeli ukuyokwethula umbiko kumakhansela oMasipala wesifunda uThukela kusukela avakasha ngoNdasa kulo nyaka.
Uphinde wagxeka umhlangano owawubanjwe phakathi kukaNgqongqoshe uHlabisa, uNdunankulu waKwaZulu-Natal uThamsanqa Ntuli kanye nosomabhizinisi, ethi kwaba yihlazo ukuthi amakhansela avalelwa ngaphandle, nakuba kuyibo abanegunya lokuthatha izinqumo emkhandlwini.
UShelembe uthe uNgqongqoshe wenza iphutha ngokungabandakanyi amakhansela, kuhlanganisa nalawo ayingxenye yeSigungu Esiphezulu soMkhandlu, ezingxoxweni ezithinta isimo sezezimali kanye nekusasa loMasipala wesifunda uThukela.
Uthe ulindele ukuthi uHlabisa aphendule ngokugcwele ukuthi uzobuyela nini ukuyokwazisa amakhansela ngenqubekela-phambili yokungenelela kukahulumeni kulo mkhandlu
