UNdunankulu waKwaZulu-Natal uThamsanqa Ntuli usenxuse ukuthi kube nokubambisana phakathi kukahulumeni nezinhlangano zomphakathi ukuze kuqedwe udlame olubhekiswe kwabesifazane nokubulawa kwabo obuyamaniswa nobulili.
UNtuli ubekhuluma ngaphandle kweNkantolo kaMantshi yaseThekwini kulandela ukuvela okokuqala enkantolo kowesilisa oneminyaka engu-46, osolwa ngamacala angu-16 okuhlukumeza ngokocansi, okubalwa kuwo awokudlwengula, endaweni yaseCato Manor eThekwini.
Umsolwa uphinde ayamaniswe namanye amacala esifundazweni iMgungundlovu. Icala lihlehliselwe umhla zingama-28 kuMandulo 2026.
UNtuli uthe uthole nemibiko yamanye amacala amaningi odlame olubhekiswe kwabesifazane nokubulawa kwabo ePhongolo naseHibberdene.Ube esenxusa izishoshovu ezilwa nodlame olubhekiswe kwabesifazane ukuthi ziqinise imikhankaso yokuqwashisa, ukuze abesifazane bazi ukuthi bangaluthola kuphi usizo futhi benzenjani uma bebhekene nezinsongo.
