UMphathiswa wezokuThutha kuleli, uBarbara Creecy, uthi uhulumeni ucubungula ukufaka enye imali eyengeziwe uma abashayeli bevuselela ama-licence disc ezimoto zabo.
Lokhu kuhloswe ngakho ukusiza ukuthi iRoad Accident Fund (RAF) iqhubeke nokuba nemali eyanele esikhathini esizayo.
UMnyango wezokuThutha uthe ukukhula kwesibalo sezimoto ezisebenzisa ugesi (electric vehicles) eNingizimu Afrika kungase kwehlise imali eqoqwa ngeRAF fuel levy, njengoba lezi zimoto zingasebenzisi uphethiloli ngendlela efanayo nezimoto ezijwayelekile.
Nokho, isikhulu esiphezulu seAutomobile Association, uBobby Ramagwede, sikugxekile lokhu. Uthe inkinga enkulu ebhekene neRAF akusikho ukushoda kwemali kodwa ukuphathwa kabi kanye nokungasebenzi kahle kohlelo.
“Kuyahlekisa ukuzwa la mazwi kaBarbara Creecy,” kusho uRamagwede.
Uqhube wathi uhulumeni kufanele uqale ngokulungisa indlela iRAF esebenza ngayo ngaphambi kokwengeza ezinye izindleko kubashayeli bezimoto.
“Akuyona imfihlo ukuthi iRAF ibhekene nezinkinga zokuphathwa kabi. Empeleni iqoqe imali eningi kunaleyo eyikhokhayo,” kusho yena.
Lesi siphakamiso sesivele sidale ukukhathazeka kubashayeli abaningi njengoba izindleko zokuphila nezokuhamba ziqhubeka nokwenyuka kuleli.
