I-MK Party KwaZulu-Natal izwakalise ukudabuka nokushaqeka ngokubulawa kwelungu layo, uMinenhle Mpungose, obehlala eWard 111 eNgonyameni, endaweni yasePass4Phungula.
Ngokwesitatimende saleli qembu, uMpungose udutshulwe wabulawa ngezikhathi zasekuseni eduze komuzi wakhe. Iqembu lithi okwamanje akukacaci ukuthi yini ebangele ukubulawa kwakhe, kanti lisalinde eminye imininingwane evela kwabezomthetho.
I-MK Party inxuse ithimba elikhethekile lamaphoyisa eliphenya ngokubulawa kwabantu abasezikhundleni zezombusazwe KwaZulu-Natal ukuba liphenye ngokushesha, lithole imbangela yesigameko nababandakanyekayo.
Leli qembu liphinde laxwayisa amalungu nabalandeli balo ngokusabalalisa imininingwane engaqinisekisiwe noma ukuzithathela umthetho ezandleni zabo. Linxuse umphakathi ukuthi ubike noma yiluphi ulwazi olungasiza amaphoyisa.
I-MK Party idlulise amazwi enduduzo emndenini, kubangani nakumalungu omphakathi athintwe yilesi sigameko.
