INgonyama uMisuzulu kaZwelithini isithumele ngokusemthethweni abakhongi, behambisana nabantwana baseNdlunkulu, emndenini kaNdlunkulu uSihle kaMawewe Mdhluli eKomatipoort, eMpumalanga, ukuyophetha izingxoxo zelobolo.
Kubikwa ukuthi iSilo sikhokhe izinkomo ezingu-70 njengelobolo likaNdlunkulu omusha. Ngemuva kokuphothulwa kwelobolo, uNdlunkulu uzokwembathiswa ngokwesintu futhi amukelwe ngokusemthethweni njengeNdlovukazi yesizwe samaZulu.
UNdlunkulu uSihle kaMawewe Mdhluli ungowasebukhosini bakwaMawewe eNkomazi. Lo mshado uzoba ngowesine weSilo uMisuzulu kaZwelithini.
