I-Underberg/Himeville Taxi Association ibambe umcimbi wayo waminyaka yonke wokweseka umphakathi, lapho inikele khona ngomfaniswano wezikole zamabanga aphansi ezingu-24 ngaphansi kukaMasipala i Dr Nkosazana Dlamini-Zuma.
Lo mcimbi ububanjelwe ehholo lomphakathi e-Underberg.
Kanti ube yimpumelelo enkulu njengoba izikole ezingama-24 zithole ukwesekwa,isikole ngasinye sithole abafundi abahlanu njengabahlomuli. Kwezinye izikole ezimbili, kuhlomule abafundi abayishumi ngenxa yesidingo esikhulu.
Sekukonke, cishe abafundi abangaba ngu-130 bathole umfaniswano wesikole ngalolu suku, okuyinto ezosiza kakhulu ekuthuthukiseni izinga labo lokufunda nasekukhuthazeni ukuzethemba.
Umcimbi uhlonishwe wubukhona bezinhlaka ezahlukene ezibalulekile emphakathini okubalwa kuzo i-SANTACO, i-SAPS, amaphoyisa omgwaqo, izinduna, othisha, umnyango wakwa COGTA kanye noMnyango Wezemfundo.
Lo mcimbi ukhombise ukubaluleka kokubambisana phakathi kwezinhlangano zomphakathi nezikhungo zikahulumeni ekwakheni ikusasa elingcono labafundi kanye nomphakathi wonke.
