Inhlangano yabafundi, Congress of South African Students (COSAS), isinxuse uMengameli Cyril Ramaphosa ukuthi amise ngokushesha uNgqongqoshe weMfundo eyisiSekelo, Siviwe Gwarube, ngenxa yezinsolo ezihlobene nethenda yezincwadi zokufunda ezibiza u-R1.6 billion.
Le thenda ibihlose ukugaya izincwadi zamabanga aphansi, iFoundation Phase, kusukela kuGrade 1 kuya kuGrade 3. Kunezinsolo zokuthi enye yezinkampani ezinikezwe umsebenzi ibisanda kusungulwa ngemuva nje kokukhishwa kwethenda, yize ingenawo amava emkhakheni wokushicilela izincwadi.
UGwarube usebhalele uNgqongqoshe wezeziMali, Enoch Godongwana, ecela ukuthi kuphenywe ngokukhishwa kwale thenda.
ICOSAS yona ifuna uphenyo oluzimele oluzokwenziwa yi-Special Investigating Unit (SIU), iphinde yafuna kubhekwe zonke izinkampani ezisebenza noMnyango Wezemfundo.
Le nhlangano iphinde yasola Democratic Alliance ngokuzama ukuvikela uGwarube kanye nokudicilela phansi ukukhathazeka komphakathi ngalolu daba.
ICOSAS ithe ngeke ithule ibukele abafundi bexhashazwa, yathi uma kungathathwa zinyathelo ngokushesha, izoqala imibhikisho ukuvikela amalungelo abafundi.
Ngakolunye uhlangothi, uGwarube uthe uma uphenyo luthola ukuthi kukhona okungahambanga kahle ngesikhathi kukhishwa ithenda, labo abathintekayo bazobhekana nezinyathelo eziqinile.
Iqembu le-ActionSA nalo seliveze ukukhathazeka ngalezi zinsolo, lathi inkohlakalo emnyangweni ingabeka engcupheni ikusasa lemfundo yabafundi.
