Inkantolo yokudlulisa izikhalazo ngamathenda KwaZulu-Natal inqume ukuthi kumiswe ukuqokwa kosonkontileka bethenda ka-R2.1 billion yoHlelo Lokondliwa Kwabafundi Ezikoleni (NSNP), kuphinde kuqalwe kabusha yonke inqubo yokuthengwa kwezinsiza.
Lesi sinqumo silandela izikhalazo zabantu nezinkampani ezingu-113 ezingaphumelelanga kule thenda, eziphakamise izinsolo zokungalandelwa kwemigomo yokungenela.
UMnyango wezeziMali esifundazweni uthi ithimba lithole ukuthi izikhalazo zinesizathu esizwakalayo. Kuphinde kwatholakala ukungahambisani nemibandela yethenda, izinkinga ekuhlolweni kwamanani kanye nokungagcinwa kwamarekhodi afanele.
UMnyango uqinisekise abazali nezikole ukuthi lesi sinqumo ngeke siphazamise ukuhlinzekwa kokudla kubafundi.
I-DA KwaZulu-Natal isamukele lesi sinqumo, yathi sibalulekile ekukhuthazeni ukungafihli lutho nokuphathwa ngendlela efanele kwezimali zomphakathi.
