Uphele emehlweni owesilisa odabuka ezweni lasePakistan owayekhululwe ngebheyili ecaleni lokunukubeza ngokocansi owesifazane ayesebenza naye kwesinye sezitolo eMnambithi.
Lo wesilisa waboshwa ngonyaka odlule ngemuva kokuba owesifazane ayesebenza ngaphansi kwakhe evule icala, emsola ngokumnukubeza ngokocansi. Ngokombiko, kuthiwa lo wesilisa wamcela ukuthi aye endlini ayehlala kuyo, emtshela ukuthi ufuna amsize ukuhlanza indlu. Kuthiwa ngesikhathi esesendlini wabe esemhlasela, wambhudubeza wabe esemnukubeza ngokocansi.
Kubikwa ukuthi lo msolwa usehluleke ukuvela enkantolo izikhathi ezintathu zilandelana. Lokhu kudale ukuthi inkantolo ikhiphe umyalelo wokuthi aboshwe.
Okwamanje akukaziwa ukuthi ukuphi, kanti amaphoyisa aqhubeka nokumfuna ukuze abuyiselwe enkantolo. Uphenyo lusaqhubeka.
