Isishoshovu esilwisana nabokufika abangekho emthethweni, uPhakelumthakathi Ndabandaba, sesiphendule ngezinsolo zokuthi saba nomhlangano oyimfihlo nabokufika ngasese.
Lezi zinsolo ziqale ukusabalala ngemuva kokuba umholi wenhlangano iLACO, uMlungisi Zondi, efake ezinkundleni zokuxhumana izithombe zikaNdabandaba ekanye namalungu enhlangano yamaSulumane(UUCSA), nokuholela ekutheni abaningi bacabange ukuthi ubehlangene nabokufika. UZondi uthe useyakwazi okwavunyelwana ngakho kulowo mhlangano, wengeza ngokuthi ukube ubungasiyo imfihlo lomhlanfano, uNdabandaba ngabe wawudalula emphakathini.
Le nkulumo idale umsindo omkhulu, ikakhulukazi njengoba ilandela ezinye izinsolo ezingakafakazelwa ezenziwa nguZondi zokuthi uNdabandaba wamukela imali kuMengameli uCyril Ramaphosa ukuze ayeke umkhankaso wakhe wokulwa nabokufika abangekho ngokusemthethweni.
Eziphendulela, uNdabandaba ushicilele isitatimende senhlangano emele amaSulumane eNingizimu Afrika, esiqinisekisa ukuthi umhlangano wenzeka futhi wawungesiyo imfihlo. Kuphinde kwavela ukuthi uNdabandaba wabhala ngalo mhlangano ekhasini lakhe le-Facebook mhla zingama-24 kuJuni, okukhombisa ukuthi akazange awufihle emphakathini.
Khonamanjalo, kubonakala sengathi ubudlelwano phakathi kukaMancinza noNdabandaba sebubhidlike ngokuphelele, yize laba bobabili bake basebenzisana kakhulu neMarch and March emikhankasweni yokulwa nabokufika abangekho emthethweni.
