Iqembu leNkatha Freedom Party (IFP) selamukele amalunga amasha angu-360 avela emaqenjini ehlukene kwezepolitiki emcimbini obuseNquthu.
Phakathi kwalabo abamukelwe kabusha kukhona nowayeyimeya kaMasipala waseNquthu, uSyabonga “Mabilabila” Kunene, obekade eseqenjini i-Abantu Batho Congress (ABC).
UNobhala we-IFP KwaZulu-Natal, uXolani Dube, kanye neMeya kaMasipala waseNquthu, uLindokuhle Shabalala, bahole umcimbi wokwamukela amalunga amasha.
UKunene uthe ubona ikusasa le-ABC lingasacaci, yingakho enqume ukubuyela “ekhaya” kwi-IFP, ethi alikho elinye iqembu alazi kangcono kuneNkatha.
Ngaso leso sikhathi, i-IFP iphinde yethula ubuholi obusha besifunda saseNquthu kulandela ingqungquthela ebibanjwe ngesonto eledlule. U-Ayanda Magubane uqokwe njengoSihlalo omusha, kwathi uNompelelo Khumalo waqokwa njengoNobhala wesifunda.
