Akasekho emhlabeni uSimphiwe Mkhonza obedume ngelika “Dr Mnandi” owangumdlali wasemuva weKaizer Chiefs, Golden Arrows neBloemfontein Celtic, emva kokuhlatshwa wukugula isikhashana.
USMkhonza uqale ukubonakala ebholeni elikhokhelayo kuleli ngo-1999 ngemuva kokunikezwa ithuba yiBloemfontein Celtic.
Uke wagijima kuRia Stars nakuGolden Arrows ngaphambi kokuthi asayinwe yiChiefs ngo-2004. Unqobe isicoco seligi naMakhosi waphinde wabizelwa kuBafana Bafana ngesikhathi eseNaturena.
Emuva kweChiefs udlulele kuSuperSport United, Maritzburg United, AmaZulu neBlack Leopards ekuhambeni kwakhe.
Ngemuva kokubeka amakhokho ethala, usebenze njengomhlaziyi wethelevishini kwaSABC futhi wenza nezifundo zokuqeqesha. Kodwa-ke, uke wanyamalala emoyeni muva nje ngemuva kokuxinwa wukugula futhi ngokudabukisayo wanqotshwa yikho.