Kube nomoya wokuzijabulisa nokuhlangana komphakathi ngesikhathi kubanjwa umcimbi iMnambithi Music Festival mhla zi-3 kuNhlaba eSettlers Park, eMnambithi.
Lo mcimbi uhlelwe yi-Banzi Productions, abaziwa kakhulu ngokuhlela i150 Maskandi Festival.
Abaculi abavelele bahlanganise IColenso Abafana Benkokhelo, Shenge WaseHlalankosi, UMjolisi, kanye noNdie, nabanye abaningi, bekhombisa ubuciko obudonse izethameli.
Yize indawo ibingagcwele ngokuphelele, kubonakale ngokusobala ukuthi labo abebekhona bajabulele kakhulu umcimbi, bedansa becula futhi beseka abaculi.
Abahleli bomcimbi bathi bahlela ukwenza lo mcimbi ube wenzeka minyaka yonke ngalesi sikhathi, ngenhloso yokukhulisa umculo wasekhaya kanye nokudala amathuba okuzijabulisa emphakathini.
