Amaphoyisa aphume umkhankaso wokuthungatha abalisa abadubule babulala umqaphi wesikhungo esihlala abafundi eNyuvesi yaseZululand eMhlathuze. Kukholakala ukuthi abahlaseli abathathu begqoke i-balaclava bagasele emakotishi ngoLwesihlanu ebusuku.
Baphuce abafundi ababili amalaptop namaselula kwelinye lamagumbi ngaphambi kokuba badlulele kwelinye baphuce omunye umfundi ucingo.
Okhulumela amaphoyisa esifundazweni uRobert Netshiunda uthe abasolwa abaziwa okwamanje.
“Amaphoyisa aseMthunzini aphenya amacala okubulala nelokugebenga kwemizi kulandela isigameko sokudutshulwa kwabulawa umqaphi wamakotishi endaweni yaseMhlathuze ngoLwesihlanu ebusuku.
“Ngemuva kokuba abasolwa sebebalekile endaweni yesigameko, kuthiwa izisulu ziye ekamelweni likanozinti ziyobika ngesigameko, zamthola edindilizile edamini legazi enenxeba lokudutshulwa.”
Khonamanjalo, inyuvesi isikumisile ukufunda ngenxa yombhikisho ophikweni oluseDlangezwa ngoMsombuluko ekuseni.