UMnyango wezokuThutha KwaZulu-Natal uthi uzobambisana ne-Special Investigating Unit (SIU) ophenyweni olujulile ngezinsolo zenkohlakalo nokuphathwa budedengu kwezimali kulomnyango.lokhu kuza nje uMengameli Cyril Ramaphosa ukhiphe isimemezelo sokuthi i-SIU,iqhubekise uphenyo kubhekwe nezinye izinkontileka zomnyango wezokuthutha.
Ekuqaleni, uphenyo belubheka izinkontileka zokwakhiwa kwamabhuloho amane, okubalwa iMngwenya River, Umlalazi River, Mhlathuze kanye nePhethu River Bridge.Manje uphenyo selubheka nokulungiswa kwemigwaqo esifundeni saso-uThukela kanye nokuhlinzekwa kwezinsiza zokuthutha umphakathi ezixhaswa uhulumeni.
I-SIU izophenya ngezinsolo zokuthi ezinye izinqubo zokuthengwa kwezinsiza kungenzeka azilandelanga imithetho, kanti kungenzeka kube nokusetshenziswa kwemali ngendlela engafanele.UNdabezinhle Sibiya womnyango uthe umnyango uzimisele ukusebenzisana ne-SIU nezinye izinhlaka zomthetho.
