INkantolo yesiFunda eRichards Bay igwebe uSiphamandla Mdletshe oneminyaka engu36 ubudala iminyaka ewu 10 ebhadla ejele,lokhu kuza ngemuva kokuba ehlambuluke wavuma icala ngokuka-Section 112(2) of the Criminal Procedure Act of 1977, lokweba amagugu ambiwayo. Nokuwumkhiqizo i-Zircon wenkampani i-Richards Bay Mineral(RBM),nokuyisigameko esenzeka ngoMarch 2024 KwaMbonambi KwaZulu-Natal.
UMdletshe egonyuluka ngesigameko, uthe wayeqashwe yinkampani i-RBM engumshayeli weloli. Uqhube wathi kukhona omunye umsebenzi owamtshela ukuthi kukhona enye indlela yokwenza amasentshana athe xaxa. Lomsebenzi wayalela uMdletshe ukuthi athathe amagugu ambiwayo ngeloli awayise ehlathini thizeni uzothola uR 2 500 ngenqola ngayinye.UMdletshe uthi wavuma, wahamba izikhawu ezinhlanu nomthwalo ewuyisa kule ndawo ababevumelene ngayo. Wakhokhelwa uR 12 500 ngamagugu ayebiwe. Izinqola ezinhlanu ezazingamathani awu-60 zazibiza uR 1.6 million.
Uphiko olukhethekile i-South African Police Service (SAPS) National Task Team,olutshalwe eRichards Bay yilona elaliphenya ngokwebiwa kwalamagugu ambiwayo lwakwazi ukuthola amathani abalelwa ku-500 e-Zircon ayethuthelwe eSipingo.
UMdletshe waboshwa ngo-August 2025 eNorth West. Nakuba yena ehlambulukile wavuma amacala kodwa abanye ayenabo abawu-10 bazobuyela enkantolo ngo-27 October 2026 ukuze kulungiselelwe ukuqulwa kwecala.UMdletshe ugwetshwe iminyaka ewu-10.
