UMeya woThukela District Municipality, Inkosi NB Shabalala, uhlangane nezakhamuzi zaseTsakane nase-Acaciaville ezikhala ngokungatholakali kwamanzi ngendlela efanele izolo.
Lezi zakhamuzi zifuna amanzi abuyiselwe ngokushesha, njengoba sezibhekene nokuphazamiseka isikhathi eside. UMeya uthe inkinga idalwa yizinselelo e-Ezakheni Water Treatment Works, okuhlanganisa ukugcwala kodaka ezindaweni okudonswa nokugcinwa kuzo amanzi, kanye neziteshi zokumpompa ezingasebenzi kahle.
Uthe ezinye izinselelo zifaka amapayipi amadala, ukuvuza, ukonakaliswa kwengqalasizinda kanye nokuvuza kwendle.
UMeya uthe njengamanje kusetshenzwa ukususa udaka, kanti kubhekwa nokwakhiwa kwedamu elisha. Okwamanje, izakhamuzi ezithintekile zihlinzekwa ngamaloli amanzi.
Uthe uMasipala uzimisele ngokuthola isixazululo esihlala njalo kule nkinga.
